Un despacho que leva doce clientes ten doce obrigados tributarios distintos, cada un co seu NIF, a súa numeración e a súa cadea de facturas. A pregunta práctica non é se o programa sabe facturar: é cantos clics hai entre un cliente e o seguinte, e que pasa o día que alguén se equivoca dun.
A carteira
Todos os clientes nunha pantalla, co cupo do paquete á vista. Cada fila leva as súas accións, e o cliente co que se está traballando queda marcado.
Consultar sen poder tocar
Esta é a parte que máis nos custou decidir. Cando se entra a revisar un cliente —mirar como vai o trimestre, descargar un borrador— non se vén a emitirlle nada. E con doce nomes parecidos nun despregable, emitir no que non é faise nun despiste.
Iso non se desfai. Unha factura emitida entra na cadea de pegadas dese NIF e só se pode rectificar, nunca borrar. Así que hai un modo de consulta: vese todo, descárgase todo, e non se pode escribir nada.
O freo non está nos botóns. Está no único sitio polo que pasan todas as chamadas ao servidor, así que unha pantalla nova non se pode esquecer del.
Os impostos dun cliente, en dous clics
Desde a propia carteira ábrese o trimestre de calquera deles, xa en modo lectura.
Convén dicilo claro, porque nisto hai moito fume: hoxe calcúlanse con datos reais o 303 e o 130. O 390, o 347, o 202, o 349, o 115 e o 111 están no produto e dinche que aínda non calculan. Preferimos que se lea escrito a que se descubra un 20 de xaneiro.
Dar de alta a carteira: pegar e listo
Ninguén vai teclear vinte clientes nun formulario de dous campos cando os ten nunha folla de cálculo. Péganse.
Admite punto e coma, coma e tabulador —o que saia de Excel— e cómese soa a cabeceira. Comproba a letra de control de cada NIF, detecta os repetidos dentro da propia lista e os que xa están na carteira. E conta o cupo: se se pegan vinte e quedan catro ocos, dío antes de comezar.
E o soporte, onde se pode seguir
O que aínda non fai
Polo mesmo motivo polo que arriba dicimos que modelos calculan e cales non:
- Ampliar o paquete non é autoservizo. Cando se enche, a pantalla dío e escríbesnos; axustámolo nós.
- Non se traspasa un cliente desde outra asesoría. Un NIF só pode estar nunha carteira: a súa cadea VERI*FACTU é unha e non admite dous donos. Resólvese falando.
- Os datos de cada cliente mantenos o despacho, non o cliente. Hoxe non hai forma de que un cliente de carteira entre a ver só o seu.
Factuza sae o 1 de setembro de 2026. O plan Xestoría vai por paquetes de 5, 10, 20, 25, 50, 100 e 150 clientes de carteira. Que inclúe exactamente cada paquete →